18‏/1‏/2010

ليه شعار حب مصر هو الحل ؟؟؟


ليه حب مصر هو الحل وليه لازم نرفع الشعار دا في الوقت دا بالذات ؟؟ الحقيقة استحملوني بقا لما احكيلكم وجهة نظري بصوا بقا لن ينصلح حال البلد دي وتعود لسابق عهودها المشرقة ومجدها وقوتها وريادتها لمنطقة الشرق الاوسط كلها الا بالحب..؟ حب ايه يا عم؟؟ ايوه بالحب!! نعم لازم نعرف نحب بعض علشان نحب مصر بمعنى اخر لازم يبقا قلبنا على بعض ..يعني المصريين يكونوا رحيمين على بعضهم شويه يعني التخلي عن افكار الفهلوه واستغلال السلطة والثروة والنفوذ يعني بلاش كلمة (انت عارف انت بتكلم مين؟؟؟) لن ينصلح حال مصر خارجياً الا بأنصلاح حالها داخلياً يعني محتاجيين حكومة من قلب الشعب المصري تحس بمعاناة المصري البسيط تحب كل المصريين ..
حب مصر يعني عدم رفع شعارات تكفر المصريين تحت مسمي الاسلام هو الحل.. يعني بلاش نكبر المواضيع ونحول أي حادثة ممكن تحصل بين مواطنين مصريين الى قضية كبيرة ياخدها كل حاقد ليصنع منها فتنه بين ابناء الوطن الواحد.. 
حب مصر يعني بلاش نستعمل مسمى مسلم ومسيحي..يعني بلاش نتعامل على اساس دين كل منا.. ففي النهاية كلنا مصريين لنا نفس الحقوق.. ووقت الخطر علينا نفس الواجبات.. حب مصر يعني تطبيق مبدأ المواطنه..
حب مصر يعني لازم نتخلى عن مشروع ونتبنا مشروع بديل.. يعني نتخلى عن مشروع فشل علشان نعمل مشروع عندنا اسباب نجاحة..
وطبعاً قصدي واضح فالمشروع القومي العربي اثبت فشله الذريع لعدد سنين تزيد عن نصف قرن ضحت مصر فيها بخيرة شبابها ورجالها في حروب لا ناقه لنا فيها ولا جمل واضاعت الكثير من الفرص لتواكب ركب الدول الكبرى الان وكانت لديها مقوماته.. وياريت كل دا ونافع لا تلاقي السب للمصريين والكره لهم من كل جانب في هذة المنطقه التي تدين لنا بالفضل وتكفر به..
بينما لدينا مشروع اخر موجود به كافة مقومات النجاح وهو المشروع القومي المصري ووحدة وادي النيل لدينا العمق السوداني الشقيق.. وادي النيل هي ارض وحدتها الطبيعة وارادة الله ولكن البشر تدخلوا ليفصلوا بين ابناء الارض الواحدة والتاريخ الواحد منذ عهد الفراعين العظام وحتى العصر الحديث كان وادي النيل ارض موحدة متكامله مواردها لها لا لغيرها..
حب مصر يعني كل ما سبق واكتر ولازم نعرف ان اسم مصر اسم مقدس وليس هناك دليل اقوى من اختيار الله لمصر لتكون ارض للانبياء وارض لحماية دينه في كل عصر.. عندما كانت اليهودية كان المصريين اول صدق ايمانه لنبي الله بينما كفر به قومه.. وعندما كانت المسيحية كانت مصر الحامية للمسيحية الحقة.. وعندما انتشر الاسلام بمصر اثبت المصريين ان الاسلام له حماة من البشر وهم شعب مصر العظيم..
هتفضل مصر عظيمة.. مرفوعه الهامه.. رائده للشرق كله مهما مكر الماكرون.. وكرهنا الحاقدون..
علشان كده حب مصر هو الحل عاشت مصر وعاشت وحدة وادي النيل.


تحياتي  محمود فرحات