٢‏/٤‏/٢٠١٤

لماذا قمنا بالثورة..؟؟؟؟

لو أنت مؤمن بالثورة وبضرورة التغيير للأحسن وخايف على مستقبل مصر وولادك.. كمل الكلام اللي جاي تحت.. ولو عايز ترجع الوضع لنقطة الصفر متضيعش وقتك وتقرا كلام أنت أصلا مش مؤمن بيه..!!

وعلى فكرة الكلام اللي جاي دا وجهة نظر شخصية بحته قد تتفق معها أو لأ..
إحنا قمنا بثورتين في 25يناير2011 و30يونيو2013 لكن ليه قمنا بثورتين؟؟؟ الحقيقة لو عرفنا الأسباب هنعرف إحنا عايزين إيه في الفترة اللي جاية...!!

لو استعرضنا أسباب كل ثورة هنلاقي الآتي:
في 25 يناير كان المحرك الرئيسي هو الفساد اللي استشرى في البلد وعدم تكافؤ الفرص بين المواطنين، كمان موضوع التوريث اللي انتشر في كل المهن والوظائف، ضياع كرامة المصريين في داخل وخارج البلاد واستغلال أصحاب النفوذ للقانون لخدمة مصالحهم...

في 30 يونيو كان المحرك الأساسي لانتفاضة المصريين هو نفس اللي فات زود عليه سرقه الهوية والثقافة المصرية القائمة على التعدد وسرقه الأرض والحدود المصرية، كمان خيبة أمل المصريين في الرئيس الأول بعد ثورتهم اللي ضحوا فيها لبناء مصر للجميع مش للجماعة...

يعني لو جمعنا الأسباب الرئيسية للثورة المصرية 25-30 هنلاقيها كما يلي:
1-   الفساد اللي لسه بياكل في جسد الوطن
2-   انعدام العدالة الاجتماعية وتكافؤ الفرص ودا برضه لسه موجود ويلوح بعودته بقوة
3-   توريث المهن والوظايف من اول رئيس الجمهورية لغاية عامل الارشيف
4-   انعدام دولة القانون وتطبيقه فقط على الضعفاء استرضاءاً لأصحاب النفوذ
5-   ضياع الكرامة للمواطن المصرية وللوطن وسط الأمم الأخرى
6-   سرقة الهوية والثقافة المصرية

وأكيد فيه أسباب تانية كتير لكن دي أهمها...انت بقا عايز تقضي على السلبيات دي علشان المصريين ومصر بكرة تبقا افضل.. لازم تختار حد تثق فيه انه لدية القدرة على تخليص مصر والمصريين من السلبيات السته دي والانطلاق بيها بين الدولة الناهضة سياسيا واقتصاديا

علشان نحقق دا لازم واحد مؤمن بالثورة واهدافها يحكم البلددي.. واحد مؤمن بالمواطن المصري.. واحد عنده تاريخ وطني مشرف ونضال سياسي محترم

الحقيقة انا مش شايف غير المناضل الشعبي حمدين صباحي هو اللي تتوافر فيه الشروط دي (و دي وجهة نظري).. هو الرئيس التوافقي اللي مفيش ليه مشاكل جذرية مع حد.. يعني مشاكله مع أي حد هتبقا مشاكل لها حلول سياسية مش بوليسية دا ع المستوى المحلي

وعلى المستوى الإقليمي والدولي حمدين صباحي رئيس مرحب بيه لأنه يمثل المرشح المدني لا الديني أو العسكري اللي تخاف التعامل معاه الدول المتقدمه