22‏/6‏/2008

للتوضيح ... قوميتنا مصرية مش عربية


بزعل قوى من اللى يقول ان المصريين عرب, و بأطغاظ أكتر لما يكون الشخص اللى بيقوللى كده مصرى , لانى ببساطة احنا مش عرب فى فرق كبيرة بين ان اكون مصرى أو عربى, للأسف حتى المصريين متلخبطين فى الموضوع و للتوضيح
المصريين هما الناس اللى عايشين فى مصر... الثقافات فى كل العالم بتتشكل حسب النشاط اليومى للناس فالحضارة المصرية مبنية على الثقافة الزراعية....و النشاط الرئيسى هو البحث عن مكان للزراعة و التعمير, و ده اللى خللى المصريين يحبوا الاستقرار و السلام,... و باقى شخصية المزارع.وللسبب ده فى مصر لغاية النهارده برة المدن فى الريف فى الأماكن اللى الزراعة لسة مصدر الدخل الرئيسى, فى مساواة أكتر من المدن بين الراجل و الست, الست بتشمر الجلابية و بتنزل مع جوزها الغيط تزرع, معاهم عيالهم بنات و أولاد كله عنده نفس الايد فى الأرض.... وكتير من الدراسات تؤكد على ان المصريين عملو اول دولة تقوم على اساس قومى صحيح ودا لما الملك مينا وحد مصر العليا و السفلى من آلاف السنين مكونة أول دولة على أساس قومى فى تاريخ البشرية.
اما العرب اللى عايشين فى شبه الجزيرة العربية والمنتمين للهوية العربية فثقافتهم بدوية والحضارة العربية مبنية على الثقافة البدوية,و النشاط الرئيسى فيها هو الانتقال من مكان أخضر للتانى (بعد استهلاكه طبعا) و هى دى الثقافة اللى بنشفها لحد النهارده, معظم حياتهم و اعلانتهم بتورى عرب بيستهلكوا, بيشتروا, بيسافروا, ما أظونش شفت اعلان فيه عربى قاعد (أو واقف) بيشتغل حقيقى. و ده طبعا واضح انه بيخلق نوع شخصية تانية خالص, شخصية الصياد أو المحارب, دى مش حاجة كويسة أو وحشة بس دى مش حاجة مصرية
طيب ليه بقى بنتسمى عرب؟
مصر احتلت من ثقافات مختلفة و كتيرة على مر العصور, محتل يسلمنا للى بعده, من الفرس للاغريق للرومان, للاحتلال العربى, اللى بيندرس انه حاجة كويسة و جميلة فى المناهج المصرية ( فتح عربى, ايه الفرق بين الفتح و الاحتلال مش عارف) دول ناس دخلوا بالسيف, غيروا لغتنا وهويتنا غصب عنا, حكمونا سنين منعوا فيها اى مصرى انه يحكم بلده.... طبعا احتلينا من غيرهم لكن دول اللى سابوا علينا أكبر أثر, و لسة محتلين من العرب ثقافيا لحد النهاردة
فى العصر الليبرالى فى مصر بعد ثورة 1919 كان فى صحيان للقومية المصرية, لدرجة ان سعد باشا زغلول رفض انه يدفن فى جامع و بداله اختار انه يدفن فى مقبرة على شكل معبد مصرى للأسف الموجة الوطنية دى اتكسرت بانقلاب 1952 من عبد الناصر و ضباط الجيش , اللى واحدة من آثارها انها قتلت الشخصية المصرية, و انه من الآخر باعنا للعرب ... فى أسباب تانية كتير طبعا ساعدت على قتل الشخصية المصرية منها: قلة التعليم ... وعدم معرفة التاريخ الحقيقى لمصر , الجماعات المت؟أسلمة التى تصف اجدادنا بالكفار والمساخيط والتقليل من تراثهم وحضارتهم ....!! يقولى العرب دخلو مصر علشان ينشروا الاسلام ؟؟؟ طيب انا مسلم و في ملايين البشر مسلمين و مش عرب أيران مش كانت تحت الحكم العربي لعقود ؟؟ ليه مبقتش عربية ؟؟
وبعدين الاسلام كان ممكن ينتشر فى مصر زى ما انتشر فى اندونسيا والصين والفلبين منغير حرب وتغير هوية الشعوب ولا اية.....!!!!
أنا بس عايز أقول اننى مش عنصري و انى مش باكره العرب لكنى مش عربي, زى مأنا مش بأكره اليابانيين أو الأيطالين مثلا لكنى مش ياياني ولا أيطالى, من حقى أكون مصري اعتز بهويتى وثقافتى المصرية .... فقوميتنا هى المصرية وليست العربية نرجو التصحيح