8‏/6‏/2009

النكسة نسخة2009

هل المصريون على ميعاد مع شهر يونيو ليحمل لهم الاحزان والنكسات والاحداث المؤلمة
الشهر دا سبحان الله مش بحبة كدة لله في لله وبحس انه اغلس شهر في السنة
ارتبط معايا من ايام الدراسة بالاحساس دا
علشان كانت الامتحانات دايما في الفترة دي
وبيكون الجو حر وانت مجبر على المذاكرة
واخوكم مكنش بيحب الامتحانات من اصله
وكنت بفضل النوم لوجود خمول والواحد بيكون مش عارف يركز
بس والله انا كنت بنجح وكنت متفوق كمان
الحقيقة عايز اقولكم مجموعة من المعلومات عن الشهر دا
وبرضة عن الاحداث السيئة اللي حصلت فية
اولا شهر يونيو واسمه بالانجليزية جون وهو نسبة لزوجة الالهة جوبيتر الروماني والمدعوة جونيو
ودا اسم شهر يونيو بالايطالي لغاية دلوقت
فالشهر دا بيبدا شهر الصيف فعليا يوم 21منة
تعرفوا ان في الشهر دا توفي النبي صلي الله علية وسلم يوم 3منه تقريبا عام629ميلادية
وكمان الصليبين عام1098ميلادية احتلوا انطاكية وواصلوا احتلال الشام
علشان يكونوا برضة في يونيو على اعتاب مدينة القدس عام1099ميلادية
في الشهر الكئيب دا برضة كانت حادثة دنشواي يوم13من عام1906ميلادية
واللي راح ضحيتها عشرات المصريين اعدموا ظلماً وجوراًوبدون محاكمة عادلة
وكانت الطامة الكبري للمصريين في يونيو يوم5من عام1967
جيش مصر المنتشي ينهزم دون ان يدخل معركة حقيقية امام اسرائيل التي كانت تسعي لهدفها التوسعي
وما اشبة اليوم بالبارحة ولكن مع الفارق المصريين في مباراة لكرة القدم امام منتخب الجزائر
برضة في يونيو المنحوس واسمحولي احيي المنتخب الجزائري لا على الفوز ولكن على الاصرار والجدية
نزل منتخب مصر واثق الخطي قلنا دحنا حنقطع الجزائر ولكن فوجئنا كلنا ان مكنش فية مباراة !!
وان الجزائريين نجحوا في خطتهم والتى كانت تقوم على ايهام المصريين ان المباراة تسير للتعادل
فنام المصريين وبلطوا وبذلوش اي جهد وراحوا في تنويم مغناطيسي عميق
وصحوا على هزيمة تاريخية لمنتخب اراه اضعف منا بكثير فنيا
الحقيقة لم تكن هناك مبارة كما لم تكن هناك معركة عام 67
ولكن ليا بعض التحفظات على بعض اللاعبين
اولهم عصام الحضري بناشدة بكل تاريخة الطويل ان يعتذر عن المنتخب في الفترة دى
كفاية بقى علية كدة واسم مصر مش لعبة يا جماعة
تغيرات نص الملعب الواقع من بداية الشوط التاني اتأخرت
وبخاصة محمد شوقي شعرت انه خلص كورة في الشوط الاول
الاطراف ضعيفه ولا تتحرك فكان طبيعي ان تكون دي النتيجة
المعلق كان رخم جدا وكان مستفز ليا طريقة تعليقة تصلح لمباراة في دوري جامعة الازهر
والله لو لعبنا الجزاير تاني 10مرات
النتيجة ابدا متطلع كدة واسألوا اخوانا الجزائريين
واخيرا اسمحولي احي الفريق الجزائري مرة تانية على الروح اللي ادى بيها
وحسبنا الله ونعم الوكيل