٢٥‏/١١‏/٢٠١١

للاسف كنت بحلم..!!!!

للاسف كنت بحلم زي ملايين المصريين لما كتبت الكلمات دي
كنت اظن ان هناك ثورة قامت وان هناك طاغية خلعه الشعب
كنت اظن ان هناك شرفاء ساندوا الثورة يدعون المجلس العسكري
كنت اظن ان مصر ستتغير كان عندي امل في التغيير بجد 
كان كلي طاقة ان اعمل وابذل ضعفها اضعاف لبناء مصر الجديدة
هكذا كتبت على صفحتي على الفيسبوك يوم رحيل المخلوع
بعد ايام عصيبه عشناها
ودا نص ما كتبت

"الشمس بدأت تشقشق
يا ابناء مصر الخالدة ..يا ابناء مصر الشرفاء
نجحت ثورة الشباب في اسقاط الطاغية
تعالوا نفكر في بكرة جديد بلا تلوث او فساد
بلا وساطة ولا محسوبيات ولا رشوة
مصر يكون فيها الجميع امام القانون واحد
مصر يعيش فيها الجميع بأمان
مصر ياخد فيها كل واحد حقه
مصر جديدة قايمه على المساواة والعدالة الاجتماعية
تعالوا نبني بلادنا
من النهاردة لما نشوف واحد مظلوم لازم ننتصر له من الظالم
لما نشوف حاجة غلط مش هقول وانا مالي
وخلي بالك
مصر دي بتاعتنا كلنا
لازم ايدينا تكون مع بعض نعمل من اجل مصر
علشان نرسم صورة اجمل لمستقبل مصر
مصر اللي هنعيشها بكرة
مصر اللي كانت حلم في خيلنا
بكرة هيكون واقع بنعيشه
الليل انزاح..والفجر طلع..وبكرة شمس الحرية هتدفينا
تحيا مصر معاش شباب مصر العظيم
وتحية للجيش المصري العظيم درع الوطن ومصدر امانه"

ليتني ما حلمت...قررت ان اكون واقعي
وان انتزع حريتي وحقي وحق اجيال ستخلفني
تحية للثورة والثوار اللي هيجيبوا الصبح